Jöklarnir eru stór hluti af Íslandi og við viljum halda því þannig

Þær breytingar sem eru að gerast í heiminum eru mjög sýnilegar okkur hér í norðrinu. Við finnum vel hvernig jöklarnir okkar eru að gefa eftir með hækkandi hitastigi. Við hjá 66°Norður viljum nota daginn til að vekja athygli á þessu máli og leggja okkar af mörkum til að sporna gegn þessari þróun.

Undanfarin ár höfum við gefið hluta af sölu okkar til Landverndar, Votlendissjóðs og Jöklarannsóknafélags Íslands, sem allir hafa það að markmiði að vernda náttúruna á einn eða annan hátt. Í ár munum við aftur styrkja Jöklarannsóknafélag Íslands.

Jöklarannsóknafélag Íslands var stofnað árið 1950, en markmið þess er að stuðla að jöklarannsóknum og fræðslu um jöklana okkar og nágrenni. Samvinna vísindamanna og sjálfboðaliða er grundvöllur félagsins sem hefur skilað miklum árangri og eflt jöklarannsóknir hér á landi enn frekar. Félagið hefur stundað mælingar á hopi og framskriði jökulsporða allt frá upphafi. Einstakir félagar hafa tekið einn eða fleiri jökulsporða í fóstur og mælt stöðu þeirra einu sinni á ári, líkt og fjölskyldan í Reykjarfirði hefur gert með Drangajökul.

Hvernig nýttist styrkurinn árið 2022

Jöklarannsóknafélag Íslands (JÖRFÍ) og 66°Norður gengu til samstarfs á síðasta ári með það að markmiði að standa vörð um íslensku jöklana með því að mæla afkomu smærri jökla á Suðurlandi og stuðla að aukinni vitundarvakningu um jöklabreytingarnar vegna hlýnunar andrúmsloftsins. Jöklarannsóknafélagið hefur sinnt mælingum á breytingum á stöðu jökulsporða undanfarin 90 ár en þær mælingar eru mikilvægt framlag til vöktunar umhverfisbreytinga sem nú eiga sér stað víða um heim. Félagið nýtti styrkinn frá 66° Norður til að mæla vetrar- og sumarafkomu á Tindfjallajökli og Eyjafjallajökli og stefnt að því að endurtaka mælingarnar á næsta ári. Hér má sjá myndband sem JÖRFÍ tók saman.

Ljósmyndir veita einstaka innsýn

Sögulegar ljósmyndir af jöklum veita einstaka innsýn í heim á hverfanda hveli vegna breytinga á loftslagi undanfarna áratugi sem hafa valdið miklu hopi jökla. Jöklarannsóknafélagið hefur farið fyrir því að safna og varðveita sögulegar ljósmyndir úr fórum félaga sem ferðuðust á og við jökla landsins á 20. öldinni og kortlögðu ferðir sínar og umhverfi með ljósmyndum. Eitt af markmiðum samstarfsins nú er heimsækja og finna marga af þeim stöðum þar sem fyrir eru til sögulegar myndir og endurgera þær, til að hægt sé með sjónrænum hætti að átta sig á þeim miklu breytingum sem orðið hafa á jöklum landsins.

Nú þegar má finna mörg ljósmyndapör á jöklavefsjánni (www.islenskirjoklar.is) en verkefnið mun bæta fleiri samanburðarmyndum í ljósmyndasafnið.