Hvað vilt þú sjá í framtíðinni í jafnréttisbaráttunni?
Að við getum horft út fyrir það sem greinir okkur að og fundið hvað við eigum sameiginlegt, hvað gerir okkur eins. Ég trúi því að breytingar eigi sér stað þegar fólk af ólíkum uppruna með ólíkar skoðanir og lífsviðhorf kemur saman til að finna sameiginlegan grundvöll og standa saman í kröfu um jafnrétti og frið á þessari fallegu jörð sem við berum öll ábyrgð á.

Af hverju fannst þér mikilvægt að vekja athygli á réttindum trans fólks í Eurovision?
Þegar barnið mitt kom út sem trans fann ég þörf á að hjálpa til við að ryðja brautina fyrir hann. Ég vildi ekki að fólk sæi hann sem eitthvað sem væri rangt, ég vildi að það sæi fallega, hugrakka og sterka einstaklinginn sem var fær um að vera heiðarlegur og trúr sjálfsmynd sinni. Ég og systur mínar vildum deila þessum vettvangi með trans samfélaginu. Þetta er samfélag sem við sannarlega elskum, dáumst að og virðum. Við vildum gefa því rödd og hjálpa til við að deila mikilvægum skilaboðum. Við vorum með um tvö hundruð milljónir áhorfenda og í gegnum allt ferlið höfðum við gott aðgengi að fjölmiðlum. Við vildum líka láta trans einstaklinga vita að fólk sæi þá, elskaði þá og styddi þá.

Ég dáist af einlægni að fólki sem hefur hugrekki til að vera sjálfum sér samkvæmt. Ég vil lifa í heimi þar sem allt fólk er frjálst og þar sem fjölbreytileikanum er fagnað í stað þess að fordæma hann.

Hvað getum við gert sem samfélag til að taka þátt í þeirri hreyfingu að skapa meiri vitund um réttindi hinsegin fólks?
Við getum ekki breytt öðrum. Við getum aðeins breytt okkur sjálfum. Þess vegna þurfum við stöðugt að vinna í okkur sjálfum. Gæta þess að við komum fram við aðra af ást og góðvild. Halda opnum huga, fræða okkur sjálf og kappkosta að verða opnari og minna dómhörð. Það getur verið erfitt en fólk getur haft áhrif á svo marga á jákvæðan hátt með því að sýna gott fordæmi sjálft.